Bacolod City Mayor Greg Gasataya nagpaathag nga indi matuod ang nagalapta nga sugilanon nga indi na pagpabalikon ang mga nasunogan sa ila nga mga lugar sa Brgy. 27.
Ang propiedad ang gina panag-iyahan sang gobyerno.
Naga apela ang alkalde, nga indi na pagdugangan pa ang palaligban sang mga residente nga nasunogan.
Suno sa iya wala siya makabuya sang sugilanon nga indi na pag pabalikon sa amo nga lugar ang mga nasunogan.
Dugang pa ni Gasataya, ang Philippine Alien Property Administration ang naga panag-iya sang amo nga propiedad.
Isa ka talatapan sang gobyerno sadto nga subong wala na naga exist.
1951 pa ini na terminate. Directly under ini sa Department of Justice sang US government.
7,757 square meters ang kalaparon sang amo nga lugar.
Nagahimo ang lokal nga panguluhan sang Bacolod sang koordinasyon sa nagakaigo nga mga ahensya sang gobyerno sa karon para ma donate ang amo nga national government property sa Bacolod LGU.
Pero, samtang wala pa maathagan ang tanan wala lang anay ginapasudlan ang area.
Subong nga hapon pungkuan sang alkalde, sang barangay council, kag lideres sang komunidad para maplastar ang mga dapat nga himuon.
Kun luyag sang mga residente nga magsaylo sa relocation pwede man kag kun tigayon nga ma donate sa siudad ang duta kag luyag sang pumuluyo diri gyapon mag istar iplastar ang tanan nga may dalan sa sulod.
Ang ini nga area ang ginakabig sang Bureau of Fire Protection nga red zone ukon delikado kun may sunog kay wala alagyan kag ikit-ikit ang mga balay.
Biyernes sang kaagahon gintupok ang kalayo ang masobra sa 200 ka balay ukon malapit sa isa ka libo ka pumuluyo.