Nagpanawagan ang Bacolod City Government sa publiko nga buligan nga magpabilin limpyo ang mga lugar bisan pa sa temporaryo nga pagka-delay sang garbage collection.
Gin pahayag ni Bacolod City Mayor Greg Gasataya, nga sa tatlo ka adlaw sang clearing operations, kapin 4,000 cubic meters sang basura ang nahakot gikan sa major kag secondary roads kag illegal dumping sites. Umpisa Enero 1, nagpirma na ang syudad sang kontrata sa International Solid Waste Integrated Management Specialists Inc., ukon ISWIM bilang bag-o nga nagakuha sang basura sang siudad.
Sa una nga adlaw sang operasyon, naka engkwentro sila sang kabudlayan, apang matapos ang engineering interventions, nabalik sa normal ang landfill operations.
Ginpahayag sang LGU nga padayon gihapon ang re-dumping, kun sa diin may mga lugar nga nalimpyohan na apang sang ginabalikan liwat ginbilinan na naman sang basura. Suno sa alkalde, ang indi insakto nga pag haboy sang basura naga-usik sang resources, nagapahinay sang progreso, kag nagaapekto sa kaayuhan sang komunidad.
Natalana naman nga magsapol si Mayor Gasataya sa Bacolod Environment and Natural Resources Office agud i-finalize ang schedule kag rota sang garbage collection sa siudad. Suno sa alkalde, ang pagsionapul magahatag sang klaro nga impormasyon sa mga kabaranggayan kag pumuluyo kon kada san-o kag paano ipatuman ang pagkolekta sang basura.*