Alkalde nag apelar sa IATF matapos ginpasaka sa modified enhanced community quarantine ang Bacolod.
Dugang nga supply sang Covid 19 vaccines ang ginahinyo nga bulig sang siudad sang Bacolod regional inter agency task force sa baylo nga dugang nga restrictions pinaagi sa pagpaidalom sang siudad sa modified enhanced community quarantine sumugod Hulyo dise sais tubtob 31.
Ini ang ginhinyo ni Mayor Evelio Leonardia sa iya sulat nga ginpadala sa RIATF agud nga ma-reconsider ang recommendasyon kag mapabilin sa general community quarantine ang status ang siudad.
Sandig man sa record sang Department of Health 6, makit-an ang dako nga pagnubo sa Covid-19 cases sang siudad.
Kun basehan ang 2 week growth rate sang Covid-19 cases sang Bacolod, naglab-ot na ini sa negative 42 percent halin sa negative 22.82 percent humalin sang tinalikdan nga tatlo tubtob apat ka semana.
Ang katapo sang business sector ang nagapanawagan man sa natungdan nga ahensya nga kuntani mapahagan-hagan ang ginapatuman nga restrictions sa pagpati nga maka-apekto ini sang lubos sa ekonomiya sang siudad kag probinsya nga tubtob karon wala pa makabangon sa epekto sang pandemya.