Mas estrikto nga pagpatuman sang minimum health protocols ang ginmando ni Mayor Evelio Leonardia sa mga pulis sa iya nga New Year’s courtesy call.
Ang staff sang Bacolod City Police Office kag napulo ka station commanders ang nagtambong sa New Year’s call sang alkalde.
Suno kay BCPO spokesperson Lieutenant Colonel Ariel Pico, nangin hangkat sang alkalde nga panubuon na ang kaso sang COVID-19 sa Bacolod gani iya gin tugyan sa kapulisan nga sa gihapon tutukan ang kampanya batuk sa COVID-19.
Ang estrikto nga pagpatuman sang minimum health standards kaangay sang pag suksok sang face mask kag physical distancing pati na ang curfew hours kag liquor ban amo ang luyag ni Leonardia nga ipadayon sang PNP.
Indi man luyag sang alkalde nga maliwat ang kaangay sang natabo nga foam party sa Barangay Pahanocoy.
Si Leonardia nagsiling sa kapulisan nga indi niya na luyag pa ipaidalom sa liwat sa lockdown ang Bacolod gani siya ang nagapangayu sang bulig sang kapulisan sa siudad.