Mayor Albee Benitez nag-request sa konseho nga matagaan sang authority to sign angut sa P5.5B loan agreement sa Landbank.
Makaligad sang negotiations sa duha ka mga banko, gin-endorso na sang City Mayor’s Office ang request sa session sang konseho para sa authority to sign ginaduso nga loan agreement upod sa Landbank of the Philippines.
Suno kay Councilor Thaddy Sayson ang Landbank amo ang napili ni Mayor Albee Benitez bangud mas manubo ang 3.70 percent nga fixed interest rate per annum kag magahatag man sila sang 3 year grace period.
Ang Development Bank of the Philippines nga isa sa mga nagsubmit sang proposal ang may P3.75 percent interest rate nga offer sa siudad.
Pero ginsiling ni Sayson, chairperson sang Committee on Finance sang konseho nga ila anay gin-defer ang request sang alkalde agud mas matun-an ang kaundan sang proposed loan agreement.
Ang P5.5B loan agreement ang gindihon sa tuyo nga matukod ang Legislative Building sa likod sang Bacolod City Government Center, makabakal sang duta para sa bag-o nga patyo, expansion sang landfill sa Barangay Felisa kag landbanking.
Kabahin sang pondo ang gamiton man sa computerization programs, port development, waterworks programs kag iban pa nga infrastructure projects sang siudad.