Magluwas sa City Health Office nga ginapaabot ni Mayor Albee Benitez nga magapatuman sang hugot nga monitoring kontra sa Mpox, maga-coordinate man siya sa Negros Occidental Provincial Government kag Civil Aviation Authority of Philippines ukon CAAP para mas mabantayan ang makalalaton nga balatian ilabi na sa mga points of entry kasubong sang airport kag mga seaport sa probinsya.
Ang Bacolod may nahauna na nga kaso sang Mpox. Ginmanduan sang alkalde ang CHO nga usisaon sang matul-id kun paano nalatnan ang pasyente.
Ginakabig sang alkalde nga isolated case ang natabo kag yara na sa pagtatap sang Corazon Locsin Montelibano Memorial Regional Hospital ang pasyente.
Ginapasiguro sang Bacolod LGU upod sa Department of Health nga napatuman ang mga tikang agud mapunggan ang paglapta sang balatian.
Padayon ang pahanumdom sang City Health Office sa publiko nga ipasiguro ang proper hygiene, pagsunod sa health protocol kag pag pakonsulta gilayon kun may mabatyagan nga sintomas nga kaangay sa Mpox.