Mayor Albee Benitez magapatunga sa konplikto sang mga kooperatiba kag korporasyon sang mga modernized jeepney sa tuyo nga indi maapektuhan ang mga pasahero sa siudad.
Ang nagaluntad nga pagbangigay sang tunga sang tagdumalahan sang Choret Corporation kag Cebu People’s Transport Cooperative ang pila lang sa mga luyag ma-solusyunan ni Mayor Albee Benitez antes pa man ini posible maka-apekto sa riding public.
Gani magapatawag siya sang pagsinapol upod sa lideres sang mga cooperative kag corporation nga nagadumala karon sang mga naga byahe nga modernized jeepney sa Bacolod.
Ang konseho sang siudad ang nagpatigayon na sang committee conference may angut diri para maduso ang rekomendasyon sa mga natungdan nga ahensya may angut sa ginapatuman nga jeepney modernization program.
Damlag pa nagpasalamat ang pamunuan sang Choret Corporation sa BTAO sang gin pang-tow kag gin-impound ang ila walo ka mga modernized jeepney nga gin-alegar gin carnap sang ila sadto ginsaligan nga caretaker sang mga bus units.
Pero liwat sila nga nanawagan sa alkalde para aksyunan ang may 22 pa ka units nga nagabyahe nga wala sang business permits sa Pta. Taytay kag Fr. Ferrero loop nga rota.
Ang katapo sang Cebu People’s Transport Cooperative nangayo man sang bulig sa siudad agud makabiya sila sa kooperatiba nga nabase sa Cebu.