Mayor Albee nagpasalig sang bulig para mapahagan-hagan ang kinawatay sang supply sang kuryente, pero pagsolbar sang problema sa kadamuon sang illegal connection sa siudad ginatugyan niya na sa NEPC. Kun may mga kunsomedor nga wala sang kaugalingon nga kuntador kag naga angut lang sa ila mga kaingod para may kuryente, ina ginatugyan na ni Mayor Albee Benitez sa Negros Electric and Power Corporation sa tion nga matigayon ang pag approve sang ila franchise application sa idalom sang joint venture agreement.
Nag gwa sa resulta sang survey sang NEPC nga ang pagkabit sang kuryente kabahin sa mga kaso sang illegal connection nga nagalab-ot sa kapin 5,000.
Indi mapat-od kun pila diri ang kaso sang pilfirage ukon pagpangawat.
Handa si Mayor Albee nga magbulig agud mapahagan-hagan ang ini nga mga kaso agud indi magpas-an sang balayran sa systems loss ang mga kunsomedor nga lehitimo nga nagabayad sang bill.
Luyag ipasiguro sang alkalde nga kun mag operate na ang NEPC dapat estable ang supply sang kuryente, masarangan ang presyo kag renewable.