Mayor Albee nagapanindugan nga indi gihapon dapat mag pangampanya ang mga job order workers bisan pa ini ang ginpahanugutan na sang COMELEC.
Nag paandam na sadto pa si Mayor Albee Benitez sa mga job order workers nga indi mangampanya para sa ila ginasuportahan nga mga kandidato ilabi na nga nagahilapit ang pinili-ay.
Bisan pa karon nga ginatugutan na ini sang COMELEC nagapabilin gihapon ang panawagan sang alkalde nga ipaiway ang makigbahin sa pamulitika.
Sa ginpa-gwa nga COMELEC Minute Resolution 24—1001, nakasaad ang Supreme Court ruling nga kutob lamang sa mga Civil Service officers kag employees ang ginadumilian nga makigbahin sa partisan political activities.
Gani exempted pati ang mga elected barangay officials, SK officials kag bisan mga JOs kag contract of service workers.
Nanindugan gihapon ang alkalde nga indi siya magsunod diri bangud ginasweldohan gihapon sang gobyerno bisan ang indi Civil Service officers kag employees.