Nagapati si Bacolod Mayor Albee Benitez nga indi na kinahanglan pa ang isa pa gid ka probinsya para sa gina propose nga Negros Island Region, nga amo naman ang gina duso ni Negros Oriental Governor Roel Degamo.
Suno kay Benitez, madugay ang amo nga proseso kag basi gani indi pa matigayon ang amo nga tikang sa sini nga administrasyon.
Luyag nga mahangpan ni Benitez ang panindugan ni Degamo kay kun “equal footing” ukon patas nga representation man lamang ang gusto sang gobernador sang Negros Oriental, ini ang sarang nga matalakay kag ma address.
Kahapon nagsapol si Governor Eugenio Jose Lacson kay Degamo sa tinutuyo nga ma engganyo ini nga mag suporta sa NIR.
Gina pasalig ni Lacson nga paagi sa padayon nga pag istoryahanay, ini nga issue ang mahatagan sang nagakaigo nga atensyon.
Samtang, suno kay Benitez padayon ang inventory sa mga offices sang national agencies lakip na ang ila manpower para sa gina duso nga Executive Order para sa sub-region ukon sa NIR.
Kun mahuman na ini, ang draft sang EO ang iya iga submit kay DILG Secretary Benjamin Abalos, Jr., para ma submit man for approval sang presidente.