May naga gwa karon nga impormasyon nga mahimo maga uyat sang isa ka cabinet position si Bacolod Mayor Albee Benitez.
Ginasiling nga may naga gwa nga impormasyon nga mahimo maga tal-os si Mayor Albee kay Sec Benjamin Abalos, Jr., sang Department of the Interior ang Local Government. Wala man sang inside information tuhoy sa amo nga balita si Governor Eugenio Jose Lacson, pero bilang reaksyon iya ginsiling sa katapo sang media nga posible man ini, kasunod sang pag gwa man sang ngalan ni Abalos bilang isa sa mga ginapaabot maga papili sa senado sa idalom sang ticket sang administrasyon.
Sini lamang na appoint ni Presidente Ferdinand Marcos, Jr., ang utod ni Mayor Albee nga si anay Congressman Francisco Benitez bilang Director General sang TESDA.
Samtang, nagapati naman si Governor Lacson nga competent si Victorias Mayor Javi Benitez nga mangin congressman sang third district matapos man nga nagbaton ang alkalde sang pila ka endorsement gikan sa mga opisyales sang distrito. Pero ini nga bagay suno sa gobernador ang yara na kay Mayor Javi nga mag desisyon. Ginsiling man ni Mayor Javi nga antes magtakop ang Setyembre may desisyon na siya pero sa karon padayon pa ang iya nga konsultasyon.