Bwas maga sugilanon liwat si Mayor Albee Benitez sa pamunuan sang Land Transportation Franchising and Regulatory Board kag Land Transportation Office agud iduso ang mga provision nga luyag malakip sang grupo sang traditional jeepney operators kag drivers sa programa.
Nalakip sa mga provision nga tuyo sang transport group nga malakip sa guidelines amo ang sole proprietorship para sa pag avail sang modern jeepney sa baylo nga magtukod sang cooperative ukon corporation kag ang pagbakal sang mas barato nga modern jeepney.
Luyag sang alkalde nga matigayon kuntani ang transition phase antes pa man magbalik ang dinakpanay sa karsada.
Pero kun may grupo nga maka kuha sang Temporary Restraining Order batuk sa pagpatuman sang PuV modernization program mahimu mapaiway anay ang enforcement.
Ginabulubanta kapin sa 3000 ka mga driver kag operator sang traditional jeepney ang mawad an sang palangabuhian kun strikto nga mapatuman ang modernization program.