Commission on Human Rights ang maga patigayon sini nga semana sang moto proprio investigation angut sa pagpamatay sang katapo sang New People’s Army sa nagkalain lain nga lugar sang probinsya.
PNP nagpasalig naman sang mas mabaskog nga pagpangusisa para mahatagan sang hustisya kag mapasabat ang mga responsable.
Suno kay Vincent Parra, ang Investigation Division Chief sang CHR – Negros Island Region, may pito ka mga persona nga gin-report pamatay sang rebeldeng grupo base sa ila nga monitoring sa mga area sakop sang Toboso, Calatrava, EB Magalona kag Victorias. Ini ang ila nga iga validate.
“Sa subong nga nakuhaan namon nga information, nga gina validate may ari kami pito ka victims nga NPA related, pero subject to validation kay may ara pa sa Himamaylan? I-validate anay naton”, suno kay Parra.
Suno kay Toboso Mayor Richard Jaojoco, sa sulod sang isa ka semana may apat ka mga ginpatay sa ila nga banwa kun sa diin gin-ako sang Roselyn Jean Pelle Command sang NPA nga sila ang responsable.
Ang pinaka ulihi nga napatay ang senior citizen nga tricycle driver matapos gintiro sang tatlo ka mga armado sa Barangay General Luna sa banwa sang Toboso Martes sang kaagahon, bagay nga gin-ako man sang Roselyn Jean Pelle Command.
Panawagan ni Jaojoco nga kuntani untaton na ang pag pamatay labi na nga may pamilya man ang mga natundan.
“Amo na ang isa nga ginhambal ko sa amon oathtaking, luoy man ang tawo. May proseso man kag indi amo na siya nga pusilon lang dayon. May pamilya man pod na sila, may kabataan man nga gina pa eskwela”, suno kay Jaojoco.
Gina pakamalaut naman ni Negros Occidental PNP Director, Col Rainerio de Chavez ang pag pamatay sang CPP NPA sa Toboso kag Calatrava.
Ini pamaagi sang grupo suno kay de Chavez nga magkuha sang atensyon sang gobyerno kag pap pahug sa sibilyan.
Iya gina pasalig ang publiko nga gina pabaskog sang PNP ang ila nga imbestigasyon kag sa pagkilala sang mga responsable.
Maga dugang man sang PNP personnel suno kay de Chavez sa mga apektado nga areas. Gina haylo ang publiko nga gilayon mag report sa mga suspicious actitivities.
“We urge all residents to stand against violence, stop supporting these lawless elements and report any sightings or suspicious activities to the nearest police station. Your cooperation is vital in ensuring that these threats are neutralized swiftly”, suno kay de Chavez.