Sa weekly monitoring report sang Office of the Provincial Veterinarian saka sa presyo sang karne kag manok ang namutikan.
Sa January 31 nga monitoring sang Office of the Provincial Veterianarina may pagsaka sa presyo sang karne sang carabao, baka kag baboy. May pagsaka man sa presyo sang manok. Ini kun ipaanggid sa presyo sang nagligad nga semana.
Sa report ni Dr Renante Decena kay Governor Eugenio Jose Lacson, namutikan ang saka sa presyo sang baboy sa District 1, 3, 4 kag 6.
260 pesos ang presyo sang karne sang baboy sa amo nga mga lugar nga may pagsaka sang lima ka pesos sa kada kilo kun ipaangid sa nagligad nga semana. ang siudad naman sang Victorias suno kay Decena ang may pinaka mahala nga presyo sa manok, 230 pesos ang kilo.
Kun iga average naman, 1.30 pesos ang ginsaka sa kada kilo sang baboy sa Negros Occidental. 3.71 pesos naman ang sa kada kilo sang manok.
Paathag ni Decena, tuga ini sang pagmahal sang feeds, kasubong man sang kakulang sang supply sang karne sang baboy kag bisan pa sang manok nga gin tuga naman sang holiday season. Dugang pa ni Decena may pagmahal man sa presyo sang live weight.
Damlag pa nag panawagan ang business sector sang maid-id nga monitoring sa presyo sang mga balaklon kasubong man ang pagpasiguro sa compliance sang suggested retail price.