Siudad sang Bacolod ang may napili-an na nga bente dos ka mga health centers nga magaserbe bilang vaccination centers sa pagdapat sang bakuna kontra COVID-19.
Ginpahayag ni Bacolod Councilor Renecito Novero nga katapo sang Vaccination Council sang siudad, ang ini nga vaccincation centers ang yara sa nagkalain-lain nga mga barangay.
Ila ginpili ang mga health centers nga malapit sa barangay gym ukon buluthuan agud may yara sang himuon nga holding area nga teniran sang mga pumuluyo nga pagabakunahan.
Suno kay Novero, ila nga ginpili ang mga health centers bangud may yara na ini nga daan sang mga medical facilities kag mahimo nalang dugangan sang refrigerators kag power generators para sa storage sang vaccine.
Ang napili-an nga mga vaccination centers ang kinahanglan pa nga maaprubahan ni Bacolod Mayor Evelio Leonardia antes ini masuguran nga butangan sang kinahanglanon nga mga kagamitan.