Ang cinnamon tree ukon kalingag ang sadto anay ginahimu lang nga uling kag paamak sa kabukiran sang probinsya.
Sin-o bala ang magdumdom nga sarang ini mabaligya kag pwede pa mahimu nga produkto?
Kasubong na lamang sang hand sanitizer, cinnamon sugar, kandila kag habon nga himo sa cinnamon nga ginabaligya sang plantsville health products sa startup market sang SM City Bacolod.
Suno kay November Canieso-Yeo, diutay na lang sadto ang mga puno sang cinnamon ukon kalingag nga nabilin sa kabukiran sang Don Salvador Benedicto, pero sang nasugdan nila ang social enterprise nagalab-ot na karon sa masobra katorse mil ang ila nga mga seedlings sang kalingag nga napangtanum humalin sang 2019.
Indi lang ordinaryo nga puno ang kalingag. Ginakabig man ini nga superfood tungod sang mahatag sini nga mga health benefits sandig man sa mga pagtuon.
Ang Plantsville Health ang nagtukod man sang partnership sa mga government agency kag sa iban pa nga private institution kag organization agud nga mas mapabaskog ang kampanya para mapangapinan ang palibot kag mapa lambo pa ang palangabuhian sang mga mangunguma paagi sa pagtanum sang kalingag.
Kaupod nila ang SM nga nagahatag man sang opportunidad sa pila pa ka mga micro small and medium enterprise sa natukod nga startup market.
Suno kay May Castro, public relations manager sang SM City Bacolod, prayoridad sang startup market nga mabuligan ang mga MSMEs,ilabi ang mga local farmers nga nagasalig sa social enterprise.
Ginalauman sang social enterprise kaupod man ang SM nga mapasanyug pa ang pagtanom sang kalingag agud mas madamo pa nga mga mangunguma ang mabuligan indi lang sa probinsya kundi pati na sa iban pa nga lugar sa pungsod.