Masobra sa 16,000 ka pumuluyo ang gin-evacuate bangud sang pagbaha tuga sang tuman nga pagbunok sang ulan sa Central kag Southern Negros.
As of 11 am nga report sang September 26, 2022 sang Provincial Disaster Management Program Division, 16,488 ang gin evacuate gikan sa tatlo ka mga banwa.
Sa banwa sang Cauayan, may pagbaha sa Barangay Inayawan kag Caliling. Sa datus sang Provincial Disaster Management Program Division, 34 ka persona ang gin evacuate Domingo sang gab-i sa Caliling kag 6 naman sa Inawayan.
Sila ang nakabalik na sa ila nga puluy-an suno kay Mayor John Rey Tabujara. Sa Sipalay City naman may pagbaha sa poblacion kag may evacuees naman gikan sa Brgy Gil Montilla, Mambaroto kag Maricalum. Sa kabilugan 16,091 ang gin-evacuate.
May 317 ka evacuees man gikan sa Brgy San Teodoro, San Vicente kag Bagroy sa Binalbagan.
25 naman ka mga banwa kag siudad ang nag suspend sang klase sa bilog nga probinsya.
Suno Zeaphard Caelian ang pamuno sang PDMPD, gina lauman nga mag mangin maayo na ang lakat sang panahon karon nga naga hina na ang bagyo kag nagapalayo na ini sa landmass sa Luzon. Pero sa gihapon abiso niya nga padayon nga mag bantay kag mag aligmat.