Ginaduso nga pag source out sang tubig para sa bulk water project gikan sa Imbang kag Malogo River ang ginapamatukan sang pila ka grupo.
Ginsiling ni Silay City Mayor Joedith Gallego sa interview sang media nga sa iya pagkonsulta sa Sangguniang Panlungsod sang Silay kag pila ka mga community nga naga lakip sang sugar planters nga sila ang naga pamalabag sa proyekto.
Paathag ni Gallego, ang gina kabalak-an sang grupo amo nga kun iga source out ang tubig gikan sa Imbang ukon sa Malogo River basi ma apektuhan man ang ila nga supply.
Sa iya nga bahin suno kay Gallego, wala siya sang problema sa bulk water project sang probinsya.
Sa ila nga bahin ini ang ginatun-an pa. May pila ka mga irigasyon sa Silay nga naga salig man sang ila nga tubig sa amo nga mga suba suno kay Gallego.
“Ako wala ko da problema galing ginkonsulta ko sa Sanggunian and then sa community, sa mga planter, naga pamalabag sila sina. Bangud ang tubig, nga ma shortage sila kun enkaso (I-source), ang Imbang kag sa Malogo. Ang sa sentral bala sang Hawaiian naga kwa na sila sa Imbang River te posible ma apektahan gid sila. May irrigation diri nga sa subong naga problema sa palibot sa tubig”, suno kay Gallego.
Ginsiling naman ni Governor Eugenio Jose Lacson nga ang bulk water project nasandig sa isa ka scientific nga pag tuon kag indi lamang subong na desisyunon.
Ang Silay City ang isa man sa maga bentaha gikan sa proyekto.
Kinahanglan na nga ang surface water naman ang I-tap para mapun-an ang kakulang sa tubig sa Negros Occidental.
Sa karon gina paabot ang bidding para sa 1.2 billion peso water project.