Nagpirma na si Bacolod City Mayor Greg Gasataya kag Department of Education Secretary Juan Edgardo “Sonny” Angara sang Memorandum of Agreement para sa 16 ka mga bag-o nga classrooms sa Progreso Village National High School sa relocation site sa Barangay Vista Alegre.
52.5 million pesos ang pondo nga ginpain sang gobyerno nasyonal para sa pagpatukod sang 16 ka mga senior high school classrooms.
Ginsiling ni Gasataya nga ini ang pinakauna nga tion nga nakasugtan sang gobyerno nasyonal nga Bacolod LGU na mismo ang mapatukod sang mga classrooms.
Dugang niya, yara na sa City Engineer's Office ang tanan nga mga dokumento para masugudan ang proyekto.
Sa karun may yara lang sang 12 ka mga classrooms ang Progreso Village National High School apang masobra na sa isa kalibo nga estudyante ang naga-eskwela diri.
Isa sa mga problema nga gina-atubang sang eskwelahan amo ang magutok nga mga classrooms.
Kun tigayon na nga mapatukod ang 16 ka mga classrooms, ginapaabot nga malikawan na ang magutok nga mga classrooms kag sarang pa maka accommodate ang eskwelahan sang dugang nga 350 tubtob 500 ka mga estudyante.
Dugang pa sang alkalde, ini nga proyekto ang kabahin man sang Nationwide Classroom Building Program sang gobyerno nasyonal bilang sabat sa 144,758 ka mga classroom backlogs sa pungsod.
[sibwp_form id=1]