Sa kada pagbubo sang ulan sa Central Negros, naga us-us man papanaog ang balas kag bato halin sa bulkan pakadto sa mga water ways pati na sa Tamburong Creek sa Brgy. Biaknabato sa La Castellana.
Suno sa PIO sang banwa nga si Remuel Lajo kahapon, Martes may ginreport na nga siyam ka mga balay nga nasulod sang bato kag balas.
Napuno na ang creek sang nagmala nga lahar pati na balas kag bato.
Sa resolution nga ginpagwa sang Protected Area Management Board sang March 5 sini nga tuig, nakasaad nga pwede ma clear ang waterways bilang preparasyon sa La Nina ukon maulanon nga panahon.
Ugaling indi lang pwede madala pagwa sa protected area. Pwede man ini magamit sang lokal nga panguluhan kag barangay.
Pero sun kay Lajo sang kahapon may instruction na naman sa ila ang Park Operations Superintendent nga si Forester Philip Lechioncito nga indi anay pagtandugon ang mga naga supon sa waterways nga yara sa sulod sang Mt. Kanlaon Natural Park ukon MKNP kag hulaton ang approval halin mismo sa DENR secretary.
Suno kay Lajo panawagan nila mas maayo kun makita mismo sang mga opisyal ang DENR ang sitwasyon sang mga sapa nga puno na sang balas kag bato.
Samtang nagakadugayan kag samtang naga bunok man ang ulan nagaka butang sa mas delikado nga sitwasyon ang mga pumuluyo bangud ang tubig naga awas na sa sapa kag balas na kag bato ang naga sulod sa mga pamalay.