Probinsya sang Negros Occidental ang may tatlo ka bag-o na record nga dengue deaths. Pero kadamuon sang kaso sang dengue ang naga panubo na sa sulod sang apat ka semana.
Sa morbidity week 34 ukon August 21 to 27 nga report sang Provincial Health Office, 85 ang new dengue cases nga na record.
Mas nubo ini kun ipaanggid sa morbidity week 33 nga may 216 nga na record nga kaso.
Humalin morbidity week 31 naga panubo na ang new dengue cases sandig sa PHO report. As of August 27, 3,956 ang total dengue cases, 1008.12 percent naman ini nga mas mataas kun ipaanggid sa kasubong nga tion sang 2021.
27 naman sa karon ang total dengue deaths nga nagalakip na sang tatlo ka new dengue deaths nga gin report.
.68 percent sa karon ang case fatality rate sang probinsya.
“But ang case right now nakita ko ka dako, ka drastic sang pagpanaog. And we are expecting that going to the month of December manaog pa gid na siya”, suno kay Tumimbang.
707 naman ang total dengue cases sang Bacolod sa August 27 nga report sang Bacolod City Health Office.
9 ang total dengue deaths. Ang Barangay Mansilingan ang may pinaka mataas nga recorded dengue cases kag gina kabig man nga hot spot.
Yara man sa top 10 sa may pinaka madamo nga kaso amo ang Barangay Taculing, Estefania, Tangub, Villamonte, Singcang-Airport, Alijis, Sum-ag, Cabug kag Mandalagan.
Padayon naman ang pagpatuman sang tikang kasubong sang information dissemination, clean-up drive kag fogging para mapamatukan ang dengue.