Probinsya sang Negros Occidental ang naka record sang napulo ka Covid deaths sa sini nga semana. Provincial Health Office nagpahayag nga lima sa sini nga kaso ang unvaccinated ang nabilin nga lima wala naman sang record sang vaccination.
Sa August 25 nga record sang Provincial Incident Management Team, 10 ang na report nga Covid deaths.
Suno kay Dr Jessica Fama, Medical Specialist 3 sang PHO, ini ang naga tumod sa na record nga covid deaths sa hulain sang nagligad nga semana. Kun ang kaso wala sang vaccine record ila nga gina kabig ini nga unvaccinated.
Kalabanan suno kay Fama, ang mga Covid deaths sa ila nga record mga unvaccinated, kag may mga co-morbidities. Wala naga untat ang PHO sa ila nga kampanya sa bakuna bangud suno kay Fama ang bakuna makabulig batuk sa Covid – 19.
Sa gina patigayon karon nga PinasLakas campaign nga tuyo malab-ot sa first 100 days ni Presidente Ferdinand Marcos, Jr., 90 percent sa 80 percent nga target mabakunahan ang dapat nga malab-ot. Sa bahin sang Negros Occidental, nagakasayuran nga masobra pa sa 680,000 ka Negrense ang lalab-uton para makuha ang target.
50 percent naman sang mga nabakunahan na sa primary dose ang dapat mahatagan sang booster shot. Nagakasayuran nga masobra pa 910,000 ka mga Negrense ang lalab-uton suno kay Fama sa nabilin nga mga inadlaw. Sa October 8 magatapos ang 100 days ukon ang PinasLakas Campaign. Ulihi nakasugod ang probinsya bangud may dengue concerns pa nga gin-una.
Sa karon suno kay Fama, naga bulig ang Relief International sa kampanya sa bakuna kag nagatutok sa demand generation sa Kabankalan City, Cauayan kag Sipalay City.
Gina plano sang DOH ang paghatag sang incentive sa mga LGU nga makalambot sang target. Kabahin diri ang pag tugot sa pag kakas sang face mask, pag hatag sang recognition kag paghatag sang cash prize.