Masskara sa Panaad. Ini ang isa sa gina lantaw nga matabo sa ginapaabot MassKara Festival sin inga Oktubre.
Suno kay Provincial Administrator Rayfrando Diaz, isa sa gina tun-an subong amo nga magamit ang Panaad Stadium kag mga LGU booth sa Panaad para sa expo sa tion sang Masskara Festival. Nagsulat si Mayor Albee Benitez sa probinsya nga naga hinyo kun pwede mahanda ang Panaad para sa Masskara Festival.
“Masugod siya sa October 1 and ma end sa 22. Ang aton to construction by order man ni Gov gin pa paspasan ta na so that we can beat the deadline nga gina hatag sa aton’, suno kay Diaz.
Suno kay Diaz, daw kasubong sa Panaad Festival magabukas ang mga LGU booth. Si Victorias Mayor Javi Benitez nga amo sa karon ang presidente sang Negros Association of Chief Executives ang naga pakig-angut sa mga alkalde para diri.
“With Mayor Javi Benitez being the president sang ACE, they are working and talking together with all the mayors nga nahidlaw man guro sa Panaad. Masskara sa Panaad, daw amo na ma gwa. May events man ta”, suno kay Diaz.
Ang amo nga hilikuton suno kay Diaz ang kabahin sang pagtib-ong sang turismo sa probinsya kag Bacolod kag pagpakita man sang synergy sa tunga sang siudad kag Negros Occidental. Kabahin man sa gintalakay sa pagsinapol sa kay Bacolod Mayor Albee Benitez, upod ang mga tourism officers sang Negros Occidental kag Association of Negros Producers, amo ang Negros Trade Fair sa Glorietta sa Makati.