Samtang naga saka ang Covid 19 cases sa Bacolod… Gina kulang ang mga medical workers sa mga ospital amo kun ngaa madasig mapuno ang mga ospital sa Bacolod.
Sa record sang Bacolod Emergency Operations Center yara na sa 89.96 percent ang capacity utilization rate sang siudad.
89.87 percent ang sa regular Covid beds kag 90.32 percent para sa ICU covid beds.
89.17% nga mgaCovid beds sa mga private hospitals ang may naga gamit na kag 90.35% naman sa government hospital.
Ang Corazon Locsin Montelibano Memorial Regional Hospital ang nagpa gwa na sang advisory sang kahapon nga indi na mag baton sang Covid kag non-Covid patients.
Setyembre katorse nagpagwa man sang advisory ang Riverside Medical Center nga indi naman sila maka baton sang Covid patients pati na ang may mga covid like symptoms bangud gina kulang man ang ila nga health care workers.
Ang Adventist Medical Center Bacolod ang nagpwa naman sang advisory nga full capacity na ang ila nga isolation ER kag Covid 19 ward. Amo man ang South Bacolod General Hospital.
Gani bilang sabat sa problema, nagpangayo na ang bacolod sang dugang mga medical workers kag supplies sa Department Of Health Region 6. Gina hulang abe ang medical workers sa karon sa siudad.
Pero may isa pa gid karon nga problema ang mga ospital sa Bacolod. May gintukod nga Medical Front Liners Alliance Of Negros ang mga health care workers sa Bacolod kag kalabanan diri mga naga trabaho sa private hospitals.
Suno sa isa sa mga convenor sang grupo nga si Noli Rosales, may mga benepisyo ang mga medical workers nga gin promisa ang gobyerno nga tubtob karon wala pa mahatag parehos sang special risk allowance, meal kag transportation allowances.
Sa bwas ma atubang sa media ang mga tiglawas sang grupo. Isa isahon nila ang tanan nga mga gin promisa sa ila sang gobyerno sa tunga tunga sang pandemic pero tubtob subong wala sa gihapon mahatag sang Department of Health.
Bangud sang sitwasyon kag sang ka kapoy isa ka mass resignation man ang gina plano.
Dugang pa ni Rosales may kapin na sa 700 ka mga health care workers ang nag resign. Sa Setyembre 21 isa ka nationwide protest action ang ila ipatigayon.