Pasado las nuebe kagab-i ginpatigayon sang Regional Police Drug Enforcement Unit 6 kag Bacolod City Police Station 2 ang drug buy-bust operation sa Burgos Street, Brgy 10, siudad sang Bacolod batuk sa kay Jojo Segovia, alyas Boy tattoo.
Nakuha kay Segovia ang masobra P2.7M nga balor sang suspected shabu. Ginakabig siya nga isa ka High Value Individual (HVI) kag yara sa regional top watchlist sang PRO 6.
Kaupod man nga nadakpan sa amo nga operation si Lijun Tayona.
Nakuha sa ila ang 44 ka plastic sachets kag bulto sang suspected shabu nga nagabug-at sang 400 grams.
Paagi sa isa ka online payment app ginpaagi ang pagbayad sang awtoridad sa mga suspect.
Ginapatihan nga si Segovia ang isa lamang ka runner kag padayon man sa karon nga gina-usisa ini sang kapulisan kun diin nag halin ang iya nga supply.
Pasado las dos naman kaina sang kaagahon, isa pa ka buy-bust operation ang ginpatigayon sang City Drug Enforcement Unit BCPO nga nagresulta sa pagkadakop kay Malcomb Marshall, alyos Noy, 24 anyos.
Nakuha sa iya ang 15 tanan ka plastic sachet kag 5 ka transparent bag sang suspected shabu nga nagabug-at sang 262 grams kag may standard drug price nga P1.7M.
Magapangatubang ang tatlo ka mga nadakpan sang kaso nga paglapas sang R.A 9165 ukon Comprehensive Dangerous Drugs Act of 2002.