Natultulan sang otoridad ang compound sa Purok Narra, Barangay Malingin sa Bago City, kon sa diin ila nadiskubrehan ang masobra P14.6 Million nga balor sang gin-alegar smuggled cigarettes, Huwebes sang hapon.
Antes sini, nagpatigayon sang checkpoint operation ang Bago PNP sa Brgy. Lag-asan sa Bago matapos makabaton sang report angot sa pag-transport sang suspected untaxed cigarettes nga iga-distribute sa siudad.
Ginparahan sang kapulisan ang isa ka van kag ginbuksan sang driver ang cargo compartment sang salakyan, kun diin una nga nakita amo ang mga nilabhan.
Apang nasiplatan sang pulis ang reams sang sigarilyo nga ginatabunan sang mga nilabhan. Didto kag ginbulgar sang driver nga ginkarga ang nasambit nga shipment sang sigarilyo halin sa isa ka compound sa Purok Narra.
Ginkadtuan sang kapulisan ang lugar agud i-verify ang impormasyon. Samtang sila ang naga-surveillance, may duha ka lalaki ang nakamutik sa ila kag nalagyo paagi sa paglumpat sa kudal sa likod nga bahin sang compound.
Sa bulig sang mga opisyales sang barangay, nasulod sang kapulisan ang compound para sa verification kag didto na nadiskubrehan ang kinarton nga sigarilyo.
[sibwp_form id=1]