Ginserbehan na sang notice to voluntarily remove illegal structures ang masobra sa 80 ka mga balay nga nahamtang sa Mambuloc Creek sa Barangay 10 sa Bacolod City.
Ini bangud nga nagakabudlayan ang Department of Public Works and Highways sa pagpadayon sang dissilting sa creek bangud ang mga structures sang amo nga balay ang nagalambot na sa alagyan sang tubig.
Ginsiling ni Retired Police Colonel Levy Pangue, pamuno sang City Legal Office Enforcement Team nga sa mga gin-issuehan notice, may isa gid ka balay yara na mismo sa tunga gid sang creek napahamtang.
Ginklaro niya, nga ang mga extensions lamang sang mga balay ang ginapakuha sang DPWH.
Sandig sa notice sang DPWH, kinahanglan nila nga mapalos gilayon ang mga structure nga nagabalabag sa alagyan sang tubig sa creek.
Dugang ni Pangue, indi makasulod ang mga heavy equipment sang DPWH sa amo nga lugar bangud sa mga kudal kag mga extension sang mga balay sa lugar.
May isa man ka footbridge sa lugar nga temporaryo anay nga kakason sang DPWH agud makalabay ang ila nga mga equipment.
Sa karon, nagapadayon ang dissilting sang DPWH sa Mambuloc creek apesar sang pagtaas sang presyo sang gatong.
[sibwp_form id=1]