Tigayon na nga naka decamp ang mga pumuluyo nga apektado sang Bagyo Tino sa Moises Padilla.
Suno kay Office of the Civil Defense Regional Director, Donato Sermeno, III, wala na sang may nabilin pa sa mga evacuation center.
Sa interview sang media sang Domingo kay Moises Padilla Mayor, Ella Garcia-Yulo, may yara sang 362 ka mga pamilya ang nawad-an sang balay. Ang iban sa ila suno sa iya ang nakakita na sang lote nga ma sayluhan.
Gina amat-amatan man sila buligan sang LGU kaangay sang pag hatag sang sin para sa ila nga mga atop. May iban man nga naga hatag sa ila.
Ang relocation site sa Inolignan nga gin-donate gikan sa estate ni Cecilia Montilla Garcia-Golez ang iga process pa lakip na ang pag subdivide.
Ang maayo nga balita suno sa iya kay sa iya nga pag-istorya kay Eric Golez nga amo ang nag-donate sang duta nga willing ini mag dugang sang lote enkaso nga kulang para sa mga luyag mag-relocate sa Inolingan.
Sa banwa naman sang La Castellana, may pila na ka pumuluyo nga nagub-an sang balay bangud sang bagyo Tino ang nakabaton sang materials.
Sa post sang page ni Mayor Añejo Nicor, naka saad nga upod ang DHSUD gin-turn-over ang mga materials sa pila ka apektado nga pumuluyo. Suno kay Mayor Añejo Nicor, 23 ang nagbaton.
May 390 ka pamilya sa La Castellana ang nagapabilin pa sa mga evacuation center.*