Nagakalatas na ang panit kag unod sining ginalangawan nga supply sang manok nga nabutang sa mga freezer nga wala naga andar sa isa ka dressing plant sa Villa Lucasan Subdivision sa Barangay Mandalagan. Ini ang naabtan sang katapo sang City Health Office, permits and licensing Division upod sa katapo sang Task Force Botagoy sa ginpatigayon nga inspeksyon Lunes sang hapon.
Sa sulod sang planta makit an pa ang kuring kag ido nga yara sa ibabaw sang wala naga andar nga chiller.
Suno kay Martin Pinaga, pamuno sang Task force Botagoy, nagligad pa Domingo naihaw ang mga manok halin man sa poultry farm sang tag iya sang dressing plant.
Gani ginkumpiskar sang mga otoridad ang 317 kilos sang naga panimaho na nga mga manok.
Gilayon nila ini nga ginsunog kag ginlubong.
Suno kay City Administrator Atty. Boyet Maghari ila usisaon kun may permit ang dressing plant kag kun diin ginabaligya ukon gina dispose ang mga supply sang manok.
Sa pag sugilanon sang Task Force Butagoy sa mga empleyado sang dressing plant ila ini kun tani nga ipakaon sa ido.