Masobra 20 ka baligyaan sa Barangay Alijis sa Bacolod ang gin-demolish sang City Legal Enforcement team. Nag bina-isay sa dalan ang katapo sang City Legal Office Enforcement Team kag sanday Barangay Alijis Punong Barangay Deogracias Dela Vega sang gin demolish ang masobra 20 ka natukod nga kiosko sa kilid sang karsada nga pasulod sa Panaad Park and Stadium. Ginapanindugan ni Dela Vega nga malawig na nga ginapahanugutan sang barangay ang pagbutang sang kiosko sa tion sang Panaad Festival kada tuig. Pero ginsiling ni City Legal Officer Atty. Romeo Carlos Ting, Jr. malawig naman nga gina antus sang mga motorista ang pag gutok sang trapiko sa lugar tungod ginalaksam na sang kiosko ang alagyan. Ang pagpatuman sang road clearing operation nabase sa hinyo sang Negros Occidental Provincial Government agud nga masolusyunan ang problema sa trapiko sa nagahilapit nga okasyon. Magluwas sa Barangay Alijis masunod nga hawanan sang Enforcement team ang sa bahin sang Barangay Mansilingan nga ginhukmungan na sang nag inulpot nga sidewalk vendors.