Ginakabig ni Bacolod Emergency Operations Center Executive Director kag City Administrator Em Ang nga madinalag-on ang ginpatigayon nga surveillance swab testing sa mga market vendors sang siudad.
Boluntaryo nga nagpaidalum sa swab testing ang 1,786 ka mga vendors gikan sa Central, Burgos, kag Libertad Market pati na sa Manokan Country kag mga manugbaligya bulak.
Ini sa pihak sang ginpatigayon nga rally kag noise barrage sang grupo sang mga vendors nga nagapamatok sa amo nga tikang sang siudad.
Suno kay Ang, wala sang dapat ikabalaka ang mga vendors bangud magahatag sang subsidy kag food packs ang siudad sa ila mga pamilya sa ti-on nga magpositibo sila sa COVID-19 kag dal-on sa quarantine facility.
Gindugang pa ni Ang nga ang mga wala nakapasakop sa surveillance testing kahapon ang mahimo lang makakadto sa Bacolod Respiratory Outpatient Center para sa libre nga swab test.
Sa idalum sang Executive Order nga ginpagwa ni Mayor Evelio Leonardia, ang mga vendors nga indi magpaidalum sa swab test ang indi paghatagan sang permission ticket ukon market pass gani indi makabaligya sa ila stall sa merkado.