Boluntaryo nga gin-surrender ni alyas “Nene” sa katapo sang Bacolod City Drug Enforcement Unit kaupod ang City Intelligence Unit kag La Carlota Police, Martes sang hapon, ang anum ka kilo nga suspected dried marijuana kag liquid marijuana – tanan nagabalor sang P823,500.
Ginsiling ni Police Lt. Col. Antonio Benitez, Jr., pamuno sang CDEU nga offshoot ang nasambit nga pag-surrender sang mga kontrabando, sa ila ginpatigayon nga buy-bust sa Bacolod, sadtong Lunes kun sa diin tatlo ka mga persona ang nakuhaan sang masobra tunga sa milyon ka pesos nga shabu kag marijuana.
Suno kay Benitez, una pa lang ini nga tion nga sila ang naka-recover sang ginatawag liquid marijuana, nga makabig man nga dangerous drugs sandig sa briefing sang Philippine Drug Enforcement Agency.
Ang liquid marijuana, suno kay Benitez, ang ready-to-use kag masami ginabala kag ginapaaso. Nagabili sang P4,500 tubtob P5,000 ang isa ka item.
Ginsiling ni Benitez nga tubtob karon, ginahibalo pa nila kun ano ang market ukon mga customers nga nagagamit sang ini nga sahi sang dangerous drugs.