Naglab-ot na sa 7,359 ang mga napanagtag nga PWD ID cards nga may QR code sang Bacolod DSSD. Wala na sang extension matapos ang ginpatuman nga pag-recall sang mga IDs.
Sumugod buas Mayo 1, ang mga PWD ID cards nga may QR codes nga gin-issue sang Bacolod DSSD amo na lamang ang kilalahon sang mga commercial establishment agud mapalab-ot ang mga benepisyo sa mga cardholders sini.
Siling ni DSSD-OIC Alma Gustilo, wala na sang extension sa renewal sang mga PWD IDs makaligad sang ginpatuman nga recall.
Sa record sang DSSD, nagalab-ot 12,000 ang mga PWD cardholders kag masobra sa 7,000 ang tigayon na nga nakabaton sang bag-o nga mga IDs nga may QR codes.
Ginmando ni Mayor Albee Benitez ang pag-recall sang mga PWD ID agud mapaiway ang pagpameke sang mga IDs kag pag-gamit sini agud makapamentaha.
May kapin sa 100 nga mga ginakabig peke nga PWD IDs ang na-recover sang DSSD sang ginpatigayon ang recall.
Magluwas sa mga PWD ID nagapadayon ang pag-ilis sang DSSD sang mga senior citizen IDs sa Bacolod sa tuyo nga mapunggan ang paglapta sang peke nga mga ID cards.