Yara na sa full alert status ang kapulisan sumugod Miyerkules nga adlaw, matapos nga gin-deploy na ang 1,794 ka mga police personnel sa nagkalain-lain nga festival sites para sa pagbukas sang ika-47 nga MassKara Festival bwas nga adlaw, Oktubre 1.
Magluwas sa mga kapulisan, naka pwesto naman ang personnel nga nagkalain-lain nga ahensya agud mapasiguro ang katawhayan sang MassKara.
Sa 10-day highlights sang MassKara, may ginapaabot pagid nga dugang nga pwersa gikan sa Police Regional Office Negros Island Region.
May 90 man ka rescue personnel, 314 ka mga force multipliers, kag 70 ka traffic personnels ang gin deploy naman sa mga festival sites.
Sa kabug-usan may 3,258 ka mga uniformed personnel ang magabantay sang seguridad sang sini nga MassKara.
Nakahanda naman ang mga masobra 100 ka mga salakyan lakip na ang mga fire trucks kag ambulansya agud mag responde sa mga posible nga insidente sa festival.
Ginsiling ni Bacolod City Police Office Director Colonel Eugene Rebadomia nga handa na ang tanan para mapasiguro ang kahilwayan sang MassKara.
Nagrekomenda man ang BCPO sang apat ka adlaw nga total gun ban sumugod Oktubre 15 tubtob 19.
Ginadumilian man sa gihapon ang pagdala sang backpacks sa sulod sang mga festival sites.
[sibwp_form id=1]