Masobra sa 24,000 ka mga botante sa Bacolod City ang iga-delist ukon kakson sang COMELEC sa list of voters sini. Samtang, ERB hearing ang paga sugdan na sa Lunes.
Ginsiling ni COMELEC-Bacolod Officer, Kathrina Trinio-Cana, nga sa Lunes, Abril 15, paga sugdan na sang Election Registration Board ang hearing para sa yadtong nag file sang ila nga voter’s registration kag iban pa gid nga mga transaction kaangay sang correction of entries kag iban pa sa ila talatapan humalin sang Pebrero 12 tubtob Marso 26. Sa amo nga period, 12,228 ang kabilugan nga transaction nga nabaton sang COMELEC-Bacolod suno kay Atty Trinio-Cana. Kun may yara gid man sang luyag nga mag file sang opposition batuk sa yadtong nag file para sa voter’s registration tubtob Abril 12 ang pag-file sang amo nga opposition sa talatapan sang COMELEC-Bacolod. Samtang, 24,759 naman ang natalana na iga delist sang COMELEC-Bacolod. Suno kay Trinio-Cana ini sila mga registrered voters nga napaslawan mag boto sa duha ka sunod-sunod nga eleksyon.
Nagapadayon naman ang voter’s registration karon kag daku ang tigayon nga maka pa rehistro sa mga gina sakdag nga satellite registration.