Byahe sang mga commercial vessels kag palangabuhian sang mananagat ginpasiguro sang Coast Guard nga indi maapektuhan sa natalana nga Marine Pollution Exercises malapit sa Bredco Port bwas.
Opisyal na nga nagbukas ang Marine Pollution Exercises ukon Marpolex nga pagalakipan sang Philippine Coast Guard upod sa Japan kag Indonesia Coast Guard sa Bacolod City.
Ang halos tatlo ka dekada na nga marine cooperation sa tunga sang tatlo ka pungsod ang magahanas sa pagpatuman sang rescue operation kag pag contain sang oil spill paagi sa simulation exercises sa baybay malapit sa Bredco Port sa bwas.
Ginpasalig ni Coast Guard Vice Admiral Roy Echeverria nga ila na napa-alinton ang mga shipping firms kag mga fisherfolk organizations sa natalana nga oil spill containment exercises agud mapasiguro nga indi maapektuhan ang byahe kag operation sa mga sea ports pati na ang palangabuhian sang mananagat.
Ginpahayag sang coast guard officials sang Japan kag Indonesia nga ang Marpolex importante agud mas mapabaskog pa sang tagsa ka pungsod ang international cooperation sa bahin sang environmental protection kag pagpasanyog sang ekonomiya bahin sa maritime industry.