Mas dako nga lugar kag mapabilin ang kontrata sa Bacolod LGU ang pila lamang sa mga gin-ayo sang Manokan Vendors kay Mayor Albee Benitez sa idalom sang public private partnership project upod sa SMPHI.
Sa pagsinapol upod sa alkalde gin-apelar sang katapo sang Manokan Country Vendors Brotherhood Association nga kuntani mas mangin malapad ang ila paga-pwestohan sa sayluhan nga temporaryo nga baligyaan kun suguran na sang SM Prime Holdings Incorporated ang pagpatukod sang ginaplano nga duha ka BPO towers sa Manokan Country.
Sa parking area sang SM ginapaabot nga ibalhin ang mga vendors kun magsugod na ang construction sang proyekto sa Marso 2024.
Suno kay David Montoya, presidente sang vendors association, luyag man nila nga mapabilin lang ang ila kontrata sa siudad sa baylo nga sa SM kun matagaan na sila sang pwesto sa bag-o nga Manokan.
Ginsiling naman ni Mayor Benitez nga ila tun-an ang hinyo sang mga vendors kag ini ang ipalab-ot man sang siudad sa SMPHI.
Sandig sa kasugtanan, i-develop sang SMPHI ang Manokan Country lakip na diri ang Vendors’ Plaza asta sa Bays Center nga sakop sang 3-hectare property sang siudad nga paga-rentahan sang SM sa sulod sang 40 ka tuig.