Naplastar na ang mga tents nga magaserbe extension sang mga tenants sang Manokan Country sa Fr. Ferrero Street.
Gani ginapaabot ni Councilor Celia Flor, pamuno sang Committee on Markets and Slaughterhouse nga sa madasun semana makasaylo na sa mga tents ang mga tenants antes sang pagpangudal sang SM Prime Holdings Incorporated sa daan nga Manokan. Naga-operate na ang temporaryo nga Manokan sa parking area sang mall.
Ugaling bangud magamay ang lugar ginpakamaayo sang Bacolod LGU nga mapatuman ang road closure sa dalan Fr. Ferrero nga sarang nila magamit sa negosyo kun masuguran na ang pag-demolish sang Manokan.
Magluwas sa tig-P20,000 nga financial assistance para sa mga roll-up door sang mga tenants, personal nga nagpain sang P500,000 nga pondo si Mayor Albee Benitez para sa mga food vouchers agud mabuligan ang 24 ka mga tenants nga apektado sang natalana nga demolisyon.
Paagi sa joint development project sang Bacolod LGU upod sa SMPHI, ginatuyo nga ma-develop ang 3-hectare property sang siudad sa reclamation area nalakip na diri ang Manokan Country.