Bangud sa kahulugbon, patay ang isa ka mangunguma matapos gintiro sang iya naka-bais sa Purok 9, Barangay Minoyan sa banwa sang Murcia, Sabado sang gab-i.
Gindala sa Murcia Health Unit sakay sa barangay ambulance ang biktima nga si alyas “Romnick”, 29-anyos, apang gindeklarar nga dead on arrival.
Suno sa imbestigasyon sang Murcia PNP, naglalisanay si alyas “Romnick” kag ang suspek nga si alyas “Jilon”.
Gin-alegar hana nga lab-on ni “Romnick” si “Jilon”, apang nag-gabot ang suspek sang pusil gikan sa sling bag kag gintiro sang makapila ka beses ang biktima.
Nalagyo si “Jilon” apang sa hot-pursuit operation kahapon Domingo, nadakpan siya sa Purok ADC, Barangay Mailum sa Bago City.
Nakuha sa 28-anyos nga suspek ang isa ka caliber .45 pistol, magazine nga loaded sang tatlo ka live ammunition kag isa ka empty magazine sang .45 caliber pistol.*