Naga-inom-inom ang pito tanan ka mga persona sa kubo nga sakop sang Sitio Gabok, Purok 7 sa Barangay Basak, banwa sang Cauayan sa Negros Occidental, sang mag-abot ang lalaki nga may dala nga pusil, Martes sang gab-i.
Nagsinggit ang suspek nga ginkilala lang kay alyas “Rudy”, kun sin-o ang isog kag nagpalupok sang armas luthang sa babaw.
Matapos sini, iya gintiro sa paa ang biktima nga ginkilala kay alyas “Doming”.
Nagdinalagan ang mga upod inom sang biktima bangud sa kakulba kag nalagyo man ang suspek, dala ang pusil nga gingamit sa krimen.
Naga-obra sa kampo bilang operator sang hand tractor ang suspek.
Suno kay Police Lt. Rygie Pigar, ang deputy chief sang Cauayan PNP, dead on arrival ang biktima sa ospital.
Suno kay Pigar, posible nga ulihi na nga nakit-an ang biktima. Masobra 20 kilometros ang kalayuon sang lugar sa proper sang banwa kag may sapa nga kinahanglan tabukon.
“Amo pa na ang ginahibalo sang aton investigator kung paano siya naka-acquire sang armas. Galing kay at large man siya subong kag base sa investigation didto, daw wala pa gid sang makatudlo kung ano ang plastada nga dira na siya”, suno kay Pigar.
[sibwp_form id=1]