May pilas sa liog kag buka ang ulo sang nasapwan ang isa ka mangunguma sa Purok Balabag, Brgy. Colonia Divina, Sagay City sang Martes.
Ginkilala ang biktima nga si Antonio Baldea, 65-anyos kag residente man sang nasambit nga lugar. Sa impormasyon nga nakuha sang Sagay City Police Station, Nobyembre 20 sang naglisensiya sa iya bata ang biktima nga mamunit apang wala ini nakapauli.
Martes, isa ka lalaki ang nakasapo sa biktima sa ibabaw sang karusa sang karbaw. Gindala pa sa hospital ang biktima kag didto gindeklarar nga patay na.
Suno kay Sagay CPS, Deputy Chief of Police, Lt. Hanna Meshel Banquil, away sa duta ang ginalantaw nga motibo sa krimen. Wala pa sang persons of interest sa pagpatay sa mangunguma kag wala man sang saksi bangud malayo ang lugar kag wala na sang makasulod nga mga salakyan.
Mga duha ka kilometro man ang kalayuon sang bangkay sang biktima sa balay sini sang ini ang nasapwan.