Mga gin awayan sadto nga liwat naungkat ang ginalantaw sang kapulisan nga motibo sa pagpatay sa isa ka mangunguma sa Barangay Pinowayan, banwa sang Don Salvador Benedicto, Biyernes sang gab-i.
Ang suspek, iya lang man nga manghod.
Ginsiling ni Police Senior Master Sergeant Ronald Retiban, chief investigator sang Don Salvador Benedicto PNP, gikan ang mag-utod sa barangay proper, sila ang nag-inom-inom upod ang iban pa nila nga mga utod kag kakilala.
Sa ila pagpauli, bangud yara na sa impluwensya sang makahulubog nga ilimnon, suno kay Retiban, naglalisay ang duha samtang nagalakat sa kamaisan kag ginbuno sang 30-anyos nga manghod ang iya 50-anyos nga magulang.
Nakaangkon sang buno sa dughan ang biktima nga gintunaan sang iya kamatayon.
Nag-surrender ang manghod sa otoridad kag detained karon sa DSB Police Station.
Suno kay Retiban, kumpleto na ang dokumento sa pagpasaka sang kaso batok sa suspek kag ginahulat na lamang ang complainant.