Wala maghuna-huna ang 53-anyos nga mangingisda nga siya ang matiruhan sang isa ka gunman matapos mag-inom-inom sa birthday celebration sa Sitio Wayang, Barangay III-Poblacion sa syudad sang Himamaylan, Negros Occidental, sadtong Domingo sang gab-i, Hulyo 13.
Ginsiling ni Police Lt. Peter Genovia, deputy chief sang Himamaylan Police Station, posible nasal-an ang biktima nga ginkilala lang kay alyas Noe bangud wala man siya sang kontra suno sa mga tawo sa lugar kag matinlo ang iya rekord.
Sa imbestigasyon, naglabay ang gunman kag iya lookout sa lugar kun sa diin naga-inom-inom ang biktima kag ang iya abyan nga si alyas Melchor, nga may apo nga naga-selebrar sang kaadlawan.
Sang magapauli na, gintiro si Noe, mga 15 metros ang kalayuon gikan sa balay sang iya abyan.
Maswerte nga nakalikaw ang biktima kag nakaagum lang sang kibyas sa iya natuo nga abaga. Siya ang gindala sa ospital kag gilayon man nga na-discharge.
Nakasuksok ang gunman sang bonnet, itom nga t-shirt kag maong nga shorts. Siya ang nalagyo upod ang lookout nga nakasuksok naman sang itom nga jacket kag maong nga shorts.