Bag-o pa man lang natapos ang piniliay kag may tatlo pa ka tuig nga mag pungko ang mga nakakuha sang bag-o nga mandato gikan sa pumuluyo, pero subong pa lang may initial talks na kun sin-o ang mangin masunod nga manok sa gubernatorial post.
Ini suno kay Cadiz City Mayor Salvador Escalante, Jr nga naga serbe man nga Secretary General sang United Negros Alliance.
Ginkasugtan na damlag pa suno kay Escalante sang coalition sang Love Negros kag UNegA nga patapuson si Governor Eugenio Jose Lacson nga katapo sang Love Negros, sang iya 3rd and final term kag ang masunod naman nga maga papili bilang gobernador ang maga gikan sa UNegA.
Suno kay Escalante, gani sa karon pa lang gina float na ang ngalan duha nila ka mga stalwart, Vice Governor Jeffrey Ferrer nga karon Congressman elect sang District 4 kag re-elected Congressman Alfredo Maranon, III sang second District.
Si Ferrer ang presidente sang UNegA kag si Maranon naman ang Chairman.
Sa interview sang media sang Lunes kay Lacson ginsiling sang gobernador nga bisan pa matapos na siya sa iya nga termino luyag niya makita nga magapabilin ang mabakod nga coalition.
Luyag niya ini nga iya mangin legacy. Bagay nga suno kay Escalante ini nga legacy ang napasa man gikan sa lider man sang UNegA, anay governor Alfredo Maranon, Jr. Mayorya sa mga naga pungko kag maga pungko nga alkalde sa Negros Occidental ang katapo sang Love Negros ukon UNegA.