May malapit sa 8,000 tanan ka mga BacCHP cards ang na diskubrehan nga wala pa mapanagtag sa mga natungdan.
Ini ang suno sa kay Mayor Greg Gasataya. Suno sa alkalde may mga nabaton sila nga reklamo nga may mga wala pa makabaton sang BacCHP cards.
Gani gin-usisa nila kag ila nadiskubrehan nga wala pa gali ini na panagtag.
Ginpangayuan sang paathag ang anay focal person sang BacCHP nga si Engineer Mae Cuaycong.
Suno sa kay Secretary to the Mayor kag ang bag-o nga focal person sang health care program nga si Atty. Jose Marty Go, sa explanation nga ginpadala sa ila ni Cuaycong iya ginsiling nga wala na nila mapadayon panagtag ang cards bangud naabtan sang election banning.
Pwede maka avail sang BacCHP bisan wala sang card pero para naman sa kay Mayor Gasataya, gingastuhan sang siudad sang 120 pesos kada card kag wala man lang ini mapanagtag.
Gani ginpang amat-amat na ini sa karon panagtag.
Ginpang turn-over na sa tagsa ka mga barangays ang cards.
May kabilogan nga 144,691 ka mga benepisyaryo ang BacCHP sa Bacolod kag kalabanan nakabaton na sang cards.