Nagdangat sa 9,610 ka mga tricycle drivers sa siudad sang Bacolod ang nag-apply para sa ayuda sang Department of Social Welfare and Development sa idalum sang Assistance to Individuals in Crisis Situation nga programa sang gobyerno.
Ginsiling ni Richelle Verdeprado-Mangga, pamuno sang Bacolod City Department of Social Services and Development nga tanan nga aplikante ang may ara man sang driver’s license, nga amo ang ginapangayo sang DSWD agud mapamatud-an nga drivers gid man ang mga ini.
Wala man sang may na disqualify sa pag-pasa sang application suno kay Mangga, apang ang final nga listahan sang mga beneficiaries ang ginapaabot pa sang siudad sini nga Lunes sang gab-i ukon buwas sa aga, Marso 31.
Sa karon, yara pa sa validation process ang amo nga mga application agud masiguro nga wala may nagdoble nga mga pangalan. Ang ma-qualify, sarang makabaton sang 5,000 pesos.
Suno kay Mayor Greg Gasataya, ginapaabot nga masugudan sa April 8 ang paghatag sang amo nga mga ayuda kag magatapos naman ini sa April 11.
Ginsiling man sang alkalde nga magahatag man ang siudad sang dugang pagid nga ayuda para sa mga Public Utility Vehicle driver matapos ang paghatag sang ayuda gikan sa gobyerno nasyonal.
Ang validated masterlist nga ipagwa sang DSWD, ang mangin basehan man sang lokal nga panguluhan para sa dugang nga ayuda.*
[sibwp_form id=1]