Ginsiling ni Atty. Reuben Mikhail Sabig, pamuno sang Bacolod Traffic and Transport Management Department ukon BTTMD, ang mga katapo sang towing team naga una anay sang 5 ka minutos nga warning agud hatagan sang tsansa ang mga salakyan nga naka park sa towing area nga makahalin.
Kag kun magsobra na sa 5 ka minuto nga indi pa maka halin ila na ini gilayon nga ikarga sa towing truck.
Ang mga salakyan ukon motor nga nakapark sa illegal areas ginahatagan sa gihapon sang ticket bilang violation sa parking ordinance.
Dugang pa ni Sabig, nagka problema ang departamento bangud napuno na ang impounding area sa Brgy. Alijis, gani kinahanglan gid ang husto nga pagdumala sa mga na tow nga mga salakyan.
Iya man ginsiling nga kada adlaw, may duha ka enforcement team nga ginadeploy agud bantayan ang mga naga illegal parking.*