Subong pa lang gina pahibalo na ang publiko nga ginapaabot nga mangin mahinay ang lakat sang trapiko sa mga dalan sa Bacolod City sa Lunes, kadungan sa pagbinalik sang mga estudyante sa mga pampubliko nga eskwelahan sa una nga adlaw sang klase.
Ginmanduan na sang Office of the City Administrator ang pamunuan sang Bacolod Transport and Traffic Management Department nga sigurohon nga may mga traffic enforcers ang tanan nga mga dalan sa siudad agud mapahagan-hagan ang lakat sang trapiko.
Suno kay City Administrator Atty. Mark Steven Mayo, pagatutukan sang siudad ang pagmando sang trapiko, ilabi na sa mga dalan nga malapit sa eskwelahan.
Dugang niya, handa man ang DRRMO nga magpatuman sang water rationing sa mga eskwelahan nga ginakulang sang tubig. Bukas man ang City Health Office nga magpatigayon sang fogging kag sanitation sa mga eskwelahan nga mag request sini.
Samtang, nagpasa naman sang resolusyon ang Sanguniang Panlungsod sang Bacolod City nga nagahaylo sa 61 ka mga punong Barangay sa siudad nga magdeploy sang mga tanod sa tanan nga buluthuan.
Sa separado pagid nga resolusyon, ginapangabay man sang SP ang BCPO nga pabaskogon ang kampanya kuntra iligal nga droga kag batuk man sa bullying sa mga buluthuan.*
[sibwp_form id=1]