Naghalin sa isa ka birthday party kag nag inom-inom ang mag-utod nga naga-edad 38 kag 42-anyos, apang sa ila pagpauli, sila ang nag-inaway, nga nagresulta sa kamatayon sang manghod.
Nabun-an sang magulang ang iya manghod sa dughan sa Sitio Pasto, Barangay Camp Clark sa banwa sang Isabela, Negros Occidental, Miyerkules sang gab-i, Hulyo 30.
Gindeklarar nga dead on arrival sa Ignacio Arroyo Memorial District Hospital ang manghod nga si alyas “Angelo”, samtang nagpalagyo naman ang magulang nga si alyas “Warren”
Ginsiling ni Police Major Joseph Partidas, hepe sang Isabela PNP, updanay nga nag-inom-inom sa isa ka birthday party ang mag-utod kag suno sa isa nila ka migo nga upod, ginakulit sang manghod ang iya magulang samtang sila ang papauli na.
Base sa imbestigasyon, makapila ka beses nga gin-alsa kag ginlampos sang manghod ang iya magulang, tubtob nga sang ulihi nga pagbangon sang magulang, iya ginbuno ang manghod kag naigo sa dughan.
At large sa gihapon ang magulang.
Nagpanugyan ang pulis nga kung indi malikawan ang pag-inom, ibutang ini sa insakto agud indi na masulit ang kapareho nga insidente.
“Actually, daw always gid gani kuno gatulog ang suspek sa ila balay (sang biktima) kay daw palangga niya man ni ang manghod, galing guro na-impito lang gid to kay tungod nakainom tapos galalisay, gulpi lang amo ni ang natabo.. Sa mga nabukid nga bahin, indi gid madula ang ila nga pag-inom kag indi pag-intyendihanay, asta malab-ot na sa amo ni. So akon pahanumdom na lang nga mas mayo likawan ang pag-inom ukon kung mag-inom man, ibutang sa insakto”, suno kay Partidas.
