Shadow

Magkuha sang video sang aksidente ukon crime scene sa pampubliko nga lugar pwede ayhan?

Nangin kontrobersyal nga balita sa pungsod ang pagluthang sang isa ka pulis sa mag-iloy sa Tarlac sang nagligad nga tuig kun sa diin nakuhaan ini sang cellphone video kag nag-viral sa social media.

Masami man naton karon nga makit-an ang pag-post sa social media sang mga video sang nagkalain-lain nga mga insidente kasubong sang mga aksidente sa dalanon.

Wala sang kasuguan sa pungsod nga nagadumili sa isa ka persona sa pagkuha sang ritrato ukon video sa mga insidente nga nagakatabo sa mga pampubliko nga lugar.

Pero kun himuon ini sa sulod sang isa ka pribado nga lugar kasubong sang balay ukon establisimiento komersyal mahimo ini nga dumili-an sang tag-iya ukon nagadumala sang lugar.

Dapat man mahibaluan sang nagakuha sang video nga indi sila mapwersa ukon mapilit sang otoridad kasubong sang pulis nga i-delete ang video bangud makabig ini nga private property sang nagkuha sang video.

Indi man pwede nga ikumpiskar sang pulis ang cellphone nga gingamit sa pagkuha sang video kun wala na-aresto ang tag-iya sini.

Apang dapat man nga tandaan sang nagakuha sang video nga indi lang sila basta nga makapost sang mga ritrato ukon video sa social media ilabi na kun may mga private citizens ukon sibilyan nga imbolbado.

Ini bangud ang isa ka persona ang may yara man sang right to privacy nga isa ka human rights ukon tawhanon nga kinamatarung.

Dapat man maghalong sa pagpost sa social media sang video sang iban nga mga persona bangud kun maguba ang ila nga reputasyon mahimo nga kasuhan sang cyber libel ang nagpost sang video.

Leave a Reply

Your email address will not be published. Required fields are marked *

Secured By miniOrangeSecured By miniOrange